ရန်ကင်အမျိုးသမီးလိင်ပိုင်းဆိုင်ရာ စော်ကားခံရသလား (FACT CHECK)

ရန်ကင်းဗုံးပေါက်ကွဲပြီးနောက် အဖမ်းခံလိုက်ရတဲ့ အမျိုးသမီးတစ်ဦးကို စစ်ကောင်စီ ဖမ်းဆီးပြီးနောက် စစ်ကြောရေးမှာ  Sexual Assault လိင်ပိုင်းဆိုင်ရာစော်ကားခံရတယ်ဆိုတဲ့ ရေးသားချက်တွေ မနေ့က လိုင်းပေါ်မှာ အတော်လေးပျံ့လာပါတယ်။ 

တကယ်တော့ မူရင်းသတင်းက RFA ကနေ တက်တာဖြစ်တယ်။ သတင်းကတော့ sexual harassment လိင်ပိုင်းဆိုင်ရာ နှောင့်ယှက်မှုလို့ အဓိပ္ပာယ်ရပါတယ်။ ဆိုလိုတာက နှုတ်အားဖြင့်သော်လည်းကောင်း၊ ခြေဟန်လက်ဟန်နဲ့သော်လည်းကောင်း ထိပါးတာတွေကို သတ်မှတ်တာပါ။ 

သတင်းအစအဆုံးနားထောင်ကြည့်သလောက် နှောင့်ယှက်ခံရတာကိုပဲ ဖော်ပြတာပါ။ Sexual abuse or assault လို့ ပါတာကို မတွေ့မိပါ။ Abuse or Assault ဒီစကားလုံးတွေက များသောအားဖြင့် အဓမ္မပြုကျင့်ခံရတဲ့ (Rape) ကေ့စ်တွေကို ဖော်ပြရာမှာသုံးတာပါ။ 

ဆိုလိုတာက အမျိုးသားတစ်ဦးက အမျိုးသမီးတစ်ဦးကို အလိုမတူဘဲ သွေးသားရယူမှု၊ တနည်းအားဖြင့် လူ့အသားချင်းထိစပ်တဲ့အခြေအနေမျိုးကို ဖွင့်ဆိုတဲ့ စကားလုံးဖြစ်ပါတယ်။ အမျိုးသမီးတစ်ဦးရဲ့ body ကို ကြည့်ပြီး လိင်အသားပေးပြောဆိုတာ၊ ပုခုံးပုတ်တာ၊ ပါးကိုင်နားကိုင် လုပ်တဲ့အခြေအနေမျိုးကိုတော့ နှောင့်ယှက်တာလို့ပဲဖွင့်ဆိုပါတယ်။ 

ဒါဆိုရင် ဖေးစ်ဘွတ်ပေါ်မှာပြောနေကြတဲ့ လိင်ပိုင်းဆိုင်ရာစော်ကားခံရမှုဆိုတဲ့ကိစ္စ ရှင်းပြီထင်ပါတယ်။ တချို့ပြောဆိုနေကြတာက ပေါင်ကြားကို ကန်တယ်၊ တုတ်တွေနဲ့ရိုက်တယ်ဆိုရင် ဒါဟာ (torture) ညှင်းပန်းနှိပ်စက်မှုမြောက်ပါတယ်။ နောက်တမျိုးကတော့ physical abuse လို့ခေါ်ပါတယ်။ ကိုယ်ထိလက်ရောက် ရိုက်နှက်မှုတွေကိုသုံးတဲ့ အသုံးပါ။ နောက်တချက် ဒီ torture ကိစ္စကိုလည်းတိတိကျကျ ခိုင်ခိုင်လုံလုံပြစရာ သက်သေကျနော်တို့ မတွေ့မိသေးပါ။ မျက်မြင်သက်သေလည်းမရှိပါ။ နားကြားစကားတွေပဲ ရှိပါသေးတယ်။ 

ဒါဖြင့် လူတွေက ဘာလို့ အဲဒီလိုသတင်းတွေကို နှစ်ခြိုက်ပြီးတော့ မျှဝေကြတာလဲ။ ဖြစ်နိုင်ခြေ ၂ ရပ်လောက်ကို ကျနော့်အယူအဆနဲ့ရှင်းပြချင်ပါတယ်။ 

၁- လူတွေက ထိတ်လန့်စရာ၊ သို့မဟုတ် သနားစရာ သတင်းမျိုးကို ပိုဖတ်ချင်ကြတယ်။ ဥပမာ ရင်နာစရာကောင်းလိုက်တာဟယ် ဆိုတာမျိုးတွေ။ ရက်စက်လိုက်ကြတာ လူမဆန်လိုက်ကြတာဆိုတဲ့ဟာမျိုးတွေပါ။ ဒါမှလည်းပဲ စစ်တပ်ကို သွေးသားထဲကနေ မုန်းတီးတဲ့စိတ်ကြောင့် ပိုပြီးတော့ ပေါက်ကွဲ၊ တော်လှန်စေမယ့် စိတ်ကို တွန်းအားပေးရာရောက်လို့ဖြစ်တယ်။  

၂- ဖမ်းဆီးခံရတဲ့ အမျိုးသမီးငယ်ရဲ့ ကောက်ကြောင်းကိစ္စတွေ ပါလာတယ်။ နောက်ပြီး လူမျိုးရေးခွဲခြားမှုကိစ္စတွေပါလာတယ်။ ဥပမာ နိုင်ငံခြားသားနဲ့ကြိုက်တယ်ဆိုတဲ့ ကိစ္စ၊ အရင် အလှပုံရိုက်ထားတဲ့ ဓာတ်ပုံလိုင်းပေါ် ပြန့်လာတဲ့ ကိစ္စတွေပါ ပါတယ်။ ဆိုတော့ လူတွေက လိုရာကို ဆွဲပြီးတော့ ဆန့်လိုက်ကြတော့တာပါပဲ။ 

ဒီနေရာမှာ စာဖတ်သူတွေမေ့လျော့နေတာက ကိုယ်တိုင်ရင်ဆိုင်ရသူနဲ့ သူ့မိသားစုရဲ့ဂုဏ်သိက္ခာ (dignity) အပိုင်းပါ။ အခု အသံဖိုင်ကို နားထောင်ကြည့်ရသလောက်က လိင်ပိုင်းဆိုင်ရာစော်ကားခံရတယ်ဆိုတဲ့ စကားလုံး မပါပါဘူး။ ဒါကို ခံရတယ်လို့ပြောလိုက်ခြင်းက အမျိုးသမီးရဲ့ဂုဏ်သိက္ခာကိုလည်း ထိခိုက်စေပါတယ်။ နေရင်းထိုင်ရင်းနဲ့အဓမ္မပြုကျင့်ခံရသလိုဖြစ်သွားစေတာပါ။

ဒါကြောင့် စကားလုံးရွေးချယ်မှုတွေကို အတော်သတိထားသင့်ပါတယ်။ ဒီလိုရေးသားတာကြောင့် စစ်ကောင်စီကို ကာပေးတာလား၊ ဒလံလား စသဖြင့် ရိုက်ခတ်လာမယ့် စကားတွေကိုလည်း ကျနော်ကြိုတွေးမိပါတယ်။ ကျနော်ရှင်းပြတာဟာ အင်္ဂလိပ်စကားလုံးတစ်ခုကို နားလည်မှုလွဲနေတဲ့အကြောင်းနဲ့ ကာယကံရှင်တွေဖက်ကို နစ်နာစေတဲ့ကိစ္စကိုထောက်ပြရခြင်းသာဖြစ်ပါတယ်။ 

စစ်ကောင်စီရဲ့တပ်သားတွေက ရမ္မက်ဆာလောင်နေတာ၊ အခွင့်ရေးရတိုင်း လစ်ရင်လစ်သလို လုပ်ချင်တာကို ကျနော်တို့တွေ အကုန်ကြားနေရ၊ သိနေရတာပါပဲ။ ဥပမာ ရုပ်ရှင်မင်းသမီးတစ်ယောက်ကို အပြင်မှာ ဖမ်းမိရင်တော့လား ဆိုတဲ့ ကျိန်းတဲ့ရဲတစ်ဦးရဲ့ လေသံက ဒါကို ထင်ဟပ်စေပါတယ်။ ဒါကြောင့်လည်း နွေဦးတော်လှန်ရေးကာလမှာ ပါဝင်နေတဲ့ အမျိုးသမီးငယ်တွေ Sexual Abuse ခံရမှာကို လူ့အခွင့်ရေးတက်ကြွလှုပ်ရှားသူတွေက စိုးရိမ်နေကြပါတယ်။